Cam-drin a Chamfanteisio’n Rhywiol ar Blant
Beth yw Cam-drin a Chamfanteisio’n Rhywiol ar Blant?
Mae Cam-drin a Chamfanteisio’n Rhywiol ar Blant yn digwydd pan fydd grŵp neu unigolyn yn gorfodi plentyn i gymryd rhan mewn gweithgarwch rhywiol drwy dwyll, pŵer neu ddarbwyllo.
Mae hyn fel arfer yn digwydd yn gyfnewid am rywbeth y mae’r dioddefwr ei eisiau neu ei angen, neu er budd ariannol neu statws uwch i’r troseddwr.
Bob blwyddyn, mae miloedd o bobl ifanc yn cael eu cam-drin yn rhywiol yn y DU. Maent yn aml yn cadw hyn yn gyfrinach. Ni fydd llawer yn deall beth sy’n digwydd.
Beth yw’r gwahaniaeth rhwng cam-drin plant yn rhywiol a chamfanteisio’n rhywiol ar blant?
Cam-drin Plant yn Rhywiol
Cam-drin plant yn rhywiol yw pan fydd plentyn neu berson ifanc yn cael ei orfodi neu ei dwyllo i gyflawni gweithgarwch rhywiol. Mae’n bosibl na fydd yn deall ei fod yn cael ei gam-drin neu fod yr hyn sy’n digwydd yn anghywir. Ac mae’n bosibl y bydd ganddo ofn dweud wrth rywun. Gall achos o gam-drin rhywiol ddigwydd i unrhyw un a gall ddigwydd mewn nifer o wahanol leoliadau, gan gynnwys yn y cartref, yr ysgol neu yn y gwaith
Nid yw cael ei gam-drin yn rhywiol fyth yn fai ar y plentyn. Mae’n bwysig gwneud yn siŵr bod plant yn gwybod hyn.
Camfanteisio’n Rhywiol ar Blant
Mae camfanteisio’n rhywiol ar blant yn fath o gam-drin rhywiol pan fydd oedolyn yn twyllo plentyn i gyflawni gweithredoedd rhywiol drwy gynnig rhywbeth iddynt. Gall hyn gynnwys anrhegion, cyffuriau, arian, statws neu sylw hyd yn oed. Unwaith y bydd yr oedolyn wedi meithrin ymddiriedaeth y person ifanc, gall ei reoli drwy drais neu fygythiadau.
Adnabod yr Arwyddion – Yn y Gymuned
Gall arwyddion bod person ifanc yn cael ei gam-drin yn rhywiol neu fod rhywun yn camfanteisio arno’n rhywiol gynnwys y canlynol:
- Person ifanc yn dod yn gyfrinachol iawn ac yn peidio â rhyngweithio â’i ffrindiau arferol
- Cysylltiad newydd â dynion neu fenywod hŷn
- Mynd ar goll o’r cartref – ac ymateb yn amddiffynnol am eu lleoliad a’r hyn y maen nhw’n ei wneud, gan ddychwelyd adref yn hwyr neu aros allan drwy’r nos yn aml
- Absennol o’r ysgol
- Derbyn galwadau a negeseuon rhyfedd ar eu ffonau symudol neu dudalennau cyfryngau cymdeithasol gan gydnabod anhysbys, a all fod yn llawer iawn hŷn, o’r tu allan i’w rhwydweithiau cymdeithasol arferol
- Meddu ar eitemau newydd a drud na allant eu fforddio fel arfer, fel ffonau symudol, iPad neu emwaith
- Newidiadau sydyn i batrymau gwisgo neu chwaeth gerddorol
- Ymddangos wedi blino a / neu’n sâl, a chysgu yn ystod oriau anarferol
- Marciau neu greithiau ar eu cyrff y maent yn ceisio eu cuddio
- Defnyddio ‘iaith stryd’ newydd neu ymateb i enw ‘stryd’ newydd
Ydych chi wedi gweld arwyddion o Gam-drin neu Gamfanteisio’n Rhywiol ar Blant?
Gallwch roi gwybod amdanynt yn ddienw i Crimestoppers ar-lein. Elusen annibynnol yw Crimestoppers sy’n gweithio i helpu cymunedau. Caiff eich adroddiad dienw ei anfon at yr awdurdod perthnasol â chyfrifoldeb cyfreithiol i ymchwilio i’r drosedd rydych wedi rhoi gwybod amdani. Gallai hyn gynnwys eich heddlu lleol, Uned Troseddau Cyfundrefnol Ranbarthol (ROCU) neu’r Asiantaeth Troseddu Cenedlaethol (NCA).
Dylech ffonio 999 bob amser mewn argyfwng lle rydych yn credu bod bygythiad i fywyd.
Y wybodaeth ddiweddaraf gan Tarian
Ymunwch â Ni
Ydych chi’n chwilio am rôl heriol a gwerthfawr lle y gallwch chi wneud gwahaniaeth gwirioneddol i’ch cymuned?
Oes gennych chi ddiddordeb mewn mynd i’r afael â throseddau difrifol a chyfundrefnol? Os oes, mae’n bosibl mai Uned Troseddau Cyfundrefnol Ranbarthol Tarian yw’r lle i chi.