Darllenwch fwy am y rolau a’r cyfleoedd sydd ar gael yn Uned Troseddau Cyfundrefnol Ranbarthol Tarian

Rwy’n gweithio fel rhan o dîm prysur a gweithredol felly rwyf allan o’r swyddfa yn aml yn rhoi cymorth gorfodi i alluoedd Tarian eraill, neu i asiantaethau partner fel yr Asiantaeth Troseddu Cenedlaethol, CThEF, neu’r Safonau Masnach. Rwyf hefyd yn trefnu ac yn cynnal gwarantau ac yn dal parseli sy’n cynnwys cyffuriau anghyfreithlon a fyddai’n cael eu dosbarthu yn ein cymunedau.

Pan fyddaf yn y swyddfa, gallaf fod yn datblygu cudd-wybodaeth am grwpiau troseddu cyfundrefnol yn y rhanbarth, casglu ffeiliau achos ar gyfer Gwasanaeth Erlyn y Goron, neu edrych drwy lawrlwythiadau ar ffonau symudol er mwyn casglu tystiolaeth. Mae’n ofynnol i mi hefyd gyflwyno tystiolaeth arbenigol yn y llys, yn arbennig yn y maes masnachu mewn cyffuriau.

Bydd diwrnod arferol yn cynnwys ymchwilio i ddynodyddion ar gyfer yr unigolyn dan sylw yn systemau’r heddlu ac o ffynonellau agored – fel gwefannau, llwyfannau’r cyfryngau cymdeithasol, fforymau ar-lein ac ati. Yna, byddaf yn cyflwyno fy nghanfyddiadau mewn adroddiad a fydd yn cynnwys asesiad a rhai llwybrau ymholi a argymhellir ar gyfer y tîm ymchwilio.

Cefais fy nenu i faes ymchwil oherwydd y rôl allweddol y mae’n ei chwarae mewn ymchwiliadau, a’r ffaith y gall canfod darn allweddol o wybodaeth arwain at ddatblygiadau sylweddol mewn achos, sy’n rhoi llawer o foddhad. Mae gweithio yn yr Uned Troseddau Cyfundrefnol Ranbarthol yn golygu fy mod yn cefnogi adrannau arbenigol iawn i fynd i’r afael â throseddau difrifol a chyfundrefnol. Mae’r gwaith bob amser yn ddiddorol, ac rwy’n teimlo’n falch fy mod yn helpu i ddiogelu ein cymunedau.

Rwy’n Dditectif Gwnstabl yn yr Uned Troseddau Economaidd Ranbarthol, ac yn arbenigo mewn ymchwiliadau i achosion o dwyll. Mae fy nyddiau bob amser yn wahanol, ond fel arfer byddaf yn treulio fy amser yn archwilio cofnodion ariannol y troseddwyr, yn nodi ac yn ceisio cysylltu â dioddefwyr troseddau, yn siarad â sefydliadau ariannol, casglu tystiolaeth a chudd-wybodaeth, cydgysylltu ag asiantaethau allanol fel Gwasanaeth Erlyn y Goron, neu’n gweithio ar ddatgelu a meddwl ymlaen am erlyniadau sydd i ddod.

Un o agweddau mwyaf heriol fy rôl yw’r nifer fawr o ddeunyddiau all gael eu casglu o ganlyniad i ymchwiliad i drosedd economaidd. Ond yn y pen draw, mae’r deunydd hwnnw yn rhan hollbwysig o jig-so a all, ar ôl ei gwblhau, arwain at sicrhau euogfarnau llwyddiannus a darganfod asedau ar gyfer y dioddefwyr.

Fel Uwch-ddadansoddwr Cudd-wybodaeth, rwy’n goruchwylio’r holl ddadansoddwyr ymchwil a gweithredol sy’n gweithio i’r Uned Troseddau Cyfundrefnol Ranbarthol. Rwy’n gyfrifol am sicrhau ansawdd eu gwaith, cyfathrebu â’u harweinwyr adran, a rheoli’r galwadau ar eu hamser.

Gallai diwrnod arferol gynnwys mynychu cyfarfodydd achos, cynnal gwaith ar ffeiliau achos adweithiol, delio â cheisiadau adrannol am waith, siarad â’r ymchwilwyr a’r dadansoddwyr rhanbarthol, neu baratoi ar gyfer achos llys.

Rhaid i Uwch-ddadansoddwr Cudd-wybodaeth feddu ar sgiliau cyfathrebu rhagorol gan ei bod yn ofynnol iddo ymgysylltu ag unigolion o rengoedd gwahanol, ar draws adrannau gwahanol, yn ddyddiol. Rhaid i chi allu cyfleu gwybodaeth hanfodol yn hyderus, a sicrhau ei bod yn ddealladwy. Mae sylw cryf at fanylder a galluoedd i weithio ar wahanol dasgau ar yr un pryd yn hanfodol hefyd. Mae’n waith buddiol iawn ac mae Tarian yn amgylchedd gwych i ddatblygu eich gyrfa ynddo.

Rwy’n gyfrifol am arwain tîm o swyddogion arbenigol iawn sy’n ymchwilio i grwpiau troseddau cyfundrefnol sy’n achosi’r lefel uchaf o niwed i’n rhanbarth. Ein prif ffocws yw amharu ar y broses o fasnachu mewn cyffuriau, ond rydym yn mynd i’r afael â nifer o feysydd troseddu eraill hefyd.

Mae diwrnod arferol yn cynnwys nifer o gyfarfodydd. Cyfarfodydd y tîm rheoli, cyfarfodydd tîm, a chyfarfodydd rhanbarthol gydag asiantaethau cenedlaethol a’m cyd-weithwyr yn yr heddluoedd. Rhwng cyfarfodydd, rwyf fel arfer yn treulio fy amser ar y ffôn yn cydlynu swyddogion a staff gweithredol, yn goruchwylio ymchwiliadau byw ac yn gwneud penderfyniadau sy’n ddibynnol ar amser.

Gall fod yn straen cymryd cyfrifoldeb am benderfyniadau fel gwerthuso risg neu roi gorchymyn i dimau arbenigol gynnal cyrchoedd ar eiddo yr un pryd. Ond yn y pen draw, mae gwybod ein bod yn gweithio i ddiogelu’r unigolion agored i niwed yn ein cymunedau yn werthfawr iawn. Mae hefyd yn fuddiol iawn bod yn rhan o dîm ymroddedig iawn.

Rwy’n dechrau’r diwrnod drwy anfon crynodebau gwaith at fy nghyd-gynorthwywyr gweinyddol yn yr heddluoedd cyfansoddol: Heddlu De Cymru, Heddlu Gwent a Heddlu Dyfed-Powys. Yna, byddaf yn ymdrin â mewnflwch y tîm gweinyddol ac ymholiadau fel trefnu ystafelloedd, archebion, ceisiadau defnyddio cyfarpar a cheisiadau am wybodaeth.

Rwy’n gwneud yn siŵr bod llythyrau wedi cael eu hanfon i’r lleoliad cywir ac yn eu dosbarthu o amgylch yr Uned Troseddau Cyfundrefnol Ranbarthol. Rwyf hefyd yn llunio cofnodion mewn cyfarfodydd, yn sicrhau bod ein cwpwrdd cyfarpar ysgrifennu yn llawn ac yn hwyluso unrhyw ymwelwyr sy’n cyrraedd i gwblhau gwaith o amgylch y swyddfeydd.

Rwyf hefyd yn helpu i gynnal y cofnodlyfrau gweithredol ac yn sicrhau bod darnau penodol o waith wedi cael eu cwblhau o fewn amserlen benodol.

Rwy’n mwynhau natur amrywiol y rôl yn fawr ac rwy’n cael y cyfle i gwrdd ag amrywiaeth eang o bobl a gweithio gyda nhw.

Cawn ddewis y digwyddiadau rydym am eu mynychu, felly rwy’n dueddol o drefnu dau neu dri digwyddiad o amgylch fy astudiaethau prifysgol bob mis. Mae’r digwyddiadau yn amrywiol iawn a gallant gael eu cynnal unrhyw le yn ne Cymru. Un o fy hoff brofiadau hyd yma yw helpu yn ystod wythnos y glas ym Mhrifysgol Caerdydd. Teithiais i’r brifysgol ar fy mhen fy hun ond gallwch deithio yno gyda’r tîm weithiau. Gwnaeth pob un ohonom gyrraedd yn eithaf cynnar er mwyn gosod ein bwrdd gyda llyfrynnau cyngor ac arweiniad, nwyddau a gweithgareddau rhyngweithiol.

Dechreuodd brysuro yn gyflym iawn ar ôl i’r drysau agor a gwnaethom gymryd ein tro i gymryd cyfrifoldeb am y stondin. Un o’r uchafbwyntiau oedd gwybod bod nifer o’r myfyrwyr wedi dod heibio i gael nwyddau am ddim a’u bod wedi gadael ar ôl dysgu rhywbeth newydd am gadw’n ddiogel ar-lein. Nid oedd nifer fawr o’r myfyrwyr y siaradais â nhw yn ymwybodol bod y negeseuon roeddent wedi eu cael ar eu cyfryngau cymdeithasol yn sgam, ac roeddent yn gwerthfawrogi cael gwybod sut y gallant amddiffyn eu hunain a’u ffrindiau yn well.

Mae pob profiad yn ddefnyddiol iawn ac rwy’n dysgu wrth helpu rhywun. Gallwch chi hefyd gofrestru i helpu gyda phrosiectau, ac edrychaf ymlaen at ymuno ag un o’r rheiny.